ក្រសួងព័ត៌មាន កំពុងស្វះស្វែងរកកិច្ចអន្តរាគមន៍ពីក្រសួងការបរទេសអាមេរិកឲ្យណែនាំវិទ្យុអាស៊ីសេរី កែតម្រូវអត្ថបទរបស់ខ្លួនដែលបានចុះផ្សាយជុំវិញបញ្ហាជម្លោះដីធ្លីនៅខេត្តក្រចេះកាលពីសប្ដាហ៍មុន។
លិខិតរបស់ក្រសួងព័ត៌មានផ្ញើទៅកាន់ក្រសួងការបរទទេសអាមេរិក តាមរយៈក្រសួងការបរទេសកម្ពុជា ដោយធ្វើឡើង ថ្ងៃទី១៥ ខែ មីនា ។
លិខិតបានរៀបរាប់ថា កាលពីថ្ងៃទី០៨ ខែមីនា វិទ្យុអាស៊ីសេរីបានផ្សាយព័ត៌មានមិនពិតថា មានពលរដ្ឋ ៦នាក់ ត្រូវបានសម្លាប់ និង ៤០នាក់ទៀតរងរបួសក្នុងហេតុការណ៍ប្រឈមមុខដាក់គ្នាដោយហិង្សារវាងអ្នកភូមិ និងសមត្ថកិច្ចចម្រុះ ជុំវិញជម្លោះដីធ្លីនៅស្រុកស្នួល ខេត្តក្រចេះ។
លិខិតនោះ ក្រសួងព័ត៌មានបានបញ្ជាក់ថា សាក្សី គឺអ្នកស្រី គិន សុភ័ក្រ ដែលធ្វើបទសម្ភាសជាមួយវិទ្យុអាស៊ីសេរី បានសារភាពប្រាប់ព្រះរាជអាជ្ញាខេត្តក្រចេះថា មុនពេលមានហិង្សាកើតឡើងរវាងអាជ្ញាធរជាមួយពលរដ្ឋ មានអ្នកយកព័ត៌មានអាស៊ីសេរីម្នាក់ឈ្មោះ អេង បានដើរបំផុសបំផុលញុះញង់ឲ្យពលរដ្ឋតស៊ូប្រឆាំងនឹងអាជ្ញាធរ កុំទទួលយកដំណោះស្រាយ ដែលឈានដល់ផ្ទុះហិង្សា។
លិខិតរបស់ក្រសួងព័ត៌មានបន្តថា ក្រោយផ្ទុះហិង្សា ក្រុមអ្នកយកព័ត៌មានអាស៊ីសេរី ប្រាប់អ្នកស្រី គិន សុភ័ក្រ អោយទទួលទូរស័ព្ទសម្ភាសជាមួយវិទ្យុអាស៊ីសេរី ដោយបង្គាប់ឲ្យរាយការណ៍ថា មានមនុស្ស ៦នាក់ស្លាប់ និងរងរបួស ៤០នាក់ នៅក្នុងការប៉ះទង្គិចនោះ។
ជាមួយគ្នានេះ ក្រសួងព័ត៌មានក៏លើកឡើងដែរថា អំពើហិង្សាជុំវិញទំនាស់ដីធ្លីនេះ គឺជាផែនការរបស់វិទ្យុអាស៊ីសេរី ដែលបានឃុបឃិតជាមួយបក្សប្រឆាំង រៀបចំឡើងជាបន្តបន្ទាប់ ដើម្បីបំផុសបំផុលឲ្យពលរដ្ឋប្រឆាំងនឹងរដ្ឋាភិបាល និងអាជ្ញាធរមានសមត្ថកិច្ចបង្កឲ្យមានហិង្សា ដើម្បីទម្លាក់កំហុសប៉ុនប៉ងផ្តួលរលំរាជរដ្ឋាភិបាល។
អ្នកនាំពាក្យក្រសួងព័ត៌មាន លោក អ៊ុកគឹម សេងបានប្រាប់វិទ្យុស្ត្រីនៅរសៀលថ្ងៃសៅរ៍ទី១៧មីនាថា ការដែលក្រសួងដាក់លិខិតស្នើសុំដូចនេះ ព្រោះតែ វិទ្យុអាស៊ីសេរីបានផ្សាយដដែលៗចំពោះឧបទ្ទវហេតុនោះ។ លោកបញ្ជាក់ថា ការផ្សាយរបស់វិទ្យុអាមេរិកផ្សាយជាខេមរៈភាសានេះ មិនមាន ភាពជាក់លាក់ ដែលត្រូវសុំការកែតម្រូវ។
នៅពេលសួរថាតើមានចំណាត់ការអ្វីបើក្រសួងការបរទេសអាមេរិក មិនធ្វើតាមសំណើនោះ ? អ្នកនាំពាក្យរូបនេះបានបញ្ជាក់ថា រឿងនេះ ត្រូវរង់ចាំការណែនាំពីរាជរដ្ឋាភិបាលម្ដងទៀត។
សំឡេង៖ លោក អ៊ុក គឹមសេង
វិទ្យុស្រី្តមិនអាចសុំការឆ្លើយបតបភ្លាមៗពីអ្នកគ្រប់គ្រងវិទ្យុអាស៊ីសេរី ឬ មន្ត្រីព័ត៌មាននៃស្ថានទូតអាមេរិកបានទេ នៅរសៀលថ្ងៃសៅរ៍នេះ ដោយគ្មានប្រភពទាក់ទង។ តែយ៉ាងណាក៏ដោយ វិទ្យុអាស៊ីសេរីពុំមានស្នាក់ការធ្វើការនៅកម្ពុជានោះទេ ចាប់តាំងពីក្រសួងព័ត៌មានបានបង្គាប់ស្ថានីយវិទ្យុក្នុងស្រុក លែងជួលម៉ោងឱ្យវិទ្យុអាស៊ីសេរី ដែលមានមូលដ្ឋាននៅទីក្រុងវ៉ាស៊ីនតោននេះ ។
គួរបញ្ជាក់ដែរថា សម្រង់ព័ត៌មានរបស់វិទ្យុអាស៊ីសេរីបានចុះផ្សាយតាមន័យដើមដូចនេះថា៖« ពលរដ្ឋជាង ២០០នាក់ កាលពីថ្ងៃទី ០៨ មីនា បាននាំគ្នាតវ៉ាបិទផ្លូវជាតិលេខ ៧៦ បំណងស្នើសុំឲ្យអាជ្ញាធរបញ្ឈប់ការឈូសឆាយផ្ទះសម្បែង និងផលដំណាំ តែត្រូវអាជ្ញាធរខែត្រក្រចេះ ភាគច្រើនជាយោធារាប់រយនាក់ ប្រដាប់អាវុធគ្រប់ដៃបានបាញ់រះមកលើពលរដ្ឋ។ ក្រោយពីការបាញ់រះ សាក្សីដែលឃើញព្រឹត្តិការណ៍នោះត្រូវអាជ្ញាធរគំរាម និងរឹតត្បិតមិនឲ្យផ្ដល់ព័ត៌មានទៅប្រព័ន្ធផ្សព្វ ផ្សាយ។ ចំណែកសារព័ត៌មានរបស់រដ្ឋាភិបាលបានស្រង់សំដីអាជ្ញាធរពាក់ព័ន្ធមកផ្សព្វផ្សាយក្នុងបំណងលាក់បាំងការពិត និងព្យាយាមការពារអាជ្ញាធរដែលបានបង្ក្រាបដោយហិង្សាមកលើពលរដ្ឋ»។
វិទ្យុអាស៊ីសេរី បានស្រង់ប្រភពពលរដ្ឋនៅក្នុងហេតុការណ៍ខាងលើមកចុះផ្សាយថា មានមនុស្ស ៦នាក់ស្លាប់ និងរងរបួស ៤០នាក់ នៅក្នុងការប៉ះទង្គិចនោះ។ តែព័ត៌មាននេះ ត្រូវបានរដ្ឋាភិបាល ក៏ដូចជាអាជ្ញាធរខេត្តក្រចេះ បដិសេធ ថា ពុំមានមនុស្សស្លាប់នោះទេ គឺមានតែ រងបួស២ នាក់ ចំណែកសមត្ថកិច្ចរងរបួស ៧ នាក់៕