ភ្នំពេញ ៖ កាលពីថ្ងៃទី១៣ ខែមីនា ប្រជាពលរដ្ឋក្នុងខេត្ដពោធិ៍សាត់ បានប្រទះឃើញគ្រាប់យុទ្ធភណ្ឌមិនទាន់ផ្ទុះ បន្សល់ទុកពីសម័យសង្គ្រាម ជាច្រើនគ្រាប់ ដែលនៅមានគុណភាពបង្កគ្រោះថ្នាក់ដល់មនុស្ស និងសត្វ នៅក្បែរផ្លូជាតិលេខ ៥។ នេះបើយោងតាមការចុះផ្សាយ ដោយគេហទំព័រអគ្គស្នងដ្ឋាននគរបាលជាតិនៅថ្ងៃទី១៥ ខែមីនានេះ។
គ្រាប់យុទ្ធភណ្ឌមិនទាន់ផ្ទុះទាំងនេះ ត្រូវបានប្រទះឃើញក្នុងព្រំប្រទល់ឃុំបឹងខ្នា ចម្ងាយ ៥០ម៉ែត្រ ស្ថិតក្នុងភូមិព្រៃផ្ដៅ ឃុំបឹងខ្នា ស្រុកបាកាន ខេត្ដពោធិ៍សាត់ មានចំនួន ៤៣គ្រាប់ ដែលរួមមាន គ្រាប់ប្រភេទ៦០មីលីម៉ែត្រ មានចំនួន ១៩គ្រាប់។ គ្រាប់មីន៦៨ ហៅស្នូលពោត មានចំនួន ១៦គ្រាប់។ គ្រាប់៨០មីលីម៉ែត្រ ១គ្រាប់ គ្រាប់បែកក្រឡាទៀប ០១គ្រាប់ គ្រាប់បែកក្បាលបេ៤០ មានចំនួន ០៤គ្រាប់ និងគ្រាប់មីន៦៩ គ្មានគីបមានចំនួន ០២គ្រាប់។
សូមជម្រាបថា អាជ្ញាធរខេត្ដបានប្រមូលយកគ្រាប់យុទ្ធភណ្ឌមិនទាន់ផ្ទុះទាំងអស់នេះ ចេញពីកន្លែងរកឃើញទៅរក្សាទុក ដើម្បីប្រគល់ជូនអង្គភាពដោះមីនស៊ីម៉ាក់។ ប្រទេសកម្ពុជា ផ្ទៃដីដែលមានគ្រាប់មីន និងគ្រាប់យុទ្ធភណ្ឌមិនទាន់ផ្ទុះគ្រប់ប្រភេទ មានប្រមាណជិត ២០០០គីឡូម៉ែត្រក្រឡា។ ក្នុងឆ្នាំ២០១៧ មជ្ឈមណ្ឌលសកម្មភាពកម្ចាត់មីនកម្ពុជា បានបោសសម្អាតមីន និងគ្រាប់យុទ្ធភណ្ឌមិនទាន់ផ្ទុះនៅលើផ្ទៃដីបានចំនួន ៨ពាន់ ៦៣៦ហិចតា ។ ក្នុងនោះ គឺបានកម្ទេចចោលគ្រាប់មីន និងគ្រាប់យុទ្ធភណ្ឌមិនទាន់ផ្ទុះ គ្រប់ប្រភេទបានចំនួន ៣ម៉ឺន ៧ពាន់ ៤៤៨គ្រាប់៕
