ភ្នំពេញ៖ ក្រុមប្រឹក្សាជាតិគណនេយ្យ នៅព្រឹកថ្ងៃ សុក្រ ទី១២សីហា នេះ បានធ្វើសន្និសីទសារព័ត៌មានអបអរសាទរជ័យលាភី យុវតីកម្ពុជាម្នាក់បានប្រឡងជាប់ចំណាក់ថ្នាក់លេខ១ ទូទាំងពិភពលោកនៅក្នុងចំណោមបេក្ខជនប្រឡងចូលរួម ១៨៣ ប្រទេស លើមុខវិជ្ជាគ្រប់គ្រងហិរញ្ញវត្ថុ ពីសមាគមគណនេយ្យករ ជំនាញរបស់ចក្រភពអង់គ្លេស (ACCA) ។
និស្សិតឆ្នាំទី៣ ជំនាញគណនេយ្យ នៃវិទ្យាស្ថានខេមអេដប៊ីហ្សនេសស្គូល កញ្ញា សុង ពេជ្រប៉ូលីន ទទួលបានពិន្ទុលើសគេក្នុងចំណោមបេក្ខជនរាប់ពាន់នាក់ទូទាំងពិភពលោកគឺ ៩៧ ពិន្ទុ ជាវិញ្ញាសារសរសេរ លើមុខវិជ្ជាគ្រប់គ្រងហិរញ្ញវត្ថុ។
អ្នករស់នៅក្នុងរាជធានីភ្នំពេញ កញ្ញា ពេជ្រប៉ូលីន សម្តែងក្តីរំភើបយ៉ាងខ្លាំងចំពោះជ័យលាភីលេខ១របស់កញ្ញា។
កញ្ញា បន្តថា អ្វីដែលធ្វើឲ្យកញ្ញាប្រឡងជាប់លេខ១គឺ កញ្ញាខិតខំប្រឹងប្រែងអាន ស្រាវជ្រាវ និងស្វ័យសិក្សា រួមផ្សំទាំងចំណេះដឹងភាសាអង់គ្លេសផងដែរ។
និស្សិតជ័យលាភីលេខ១រូបនេះ បានអះអាងថា ប្រទេសកម្ពុជានឹងត្រូវបានពិភពលោកស្គាល់កាន់តែច្រើន ដោយសារ កញ្ញាជានិស្សិតកម្ពុជាដំបូងគេដែលទទួលបានជ័យលាភីលេខ ១ ផ្នែកគណនេយ្យ។ កញ្ញាសង្ឃឹមថា នឹងក្លាយជាធនធានមនុស្សដ៏សំខាន់ក្នុងការជួយអភិវឌ្ឍប្រទេសកម្ពុជា។
កញ្ញា សុង ពេជ្រប៉ូលីន៖ «ខ្ញុំមានអារម្មណ៍សប្បាយចិត្តខ្លាំង …. ខ្ញុំសឹងតែអត់ជឿថាខ្ញុំជាប់លេខ១ ដោយសារខ្ញុំធ្លាប់ប្រឡងមុខវិជ្ជាផ្សេងៗនៅស្រុកខ្មែរ ក៏ខ្ញុំធ្លាប់បានលេខ១ដែរ ប៉ុន្តែពេលចំណាត់ថ្នាក់ជាសកលលោក អាចបានត្រឹមលេខ៣ ប៉ុណ្ណោះ»។
លោក ខេស៊ី បាណេង នាយកវិទ្យាស្ថានខេមអេដប៊ីហ្សនេសស្គូល បាននិយាយថា ជំនាញផ្នែកគណនេយ្យនាពេលបច្ចុប្បន្នគឺជានិន្នាការមួយជាសកលនៅតាមបណ្តាក្រុមហ៊ុនធំៗនៅលើពិភបលោក។
លោកបន្តថា ប្រសិនបើប្រទេសកម្ពុជាប្រើប្រាស់ស្តង់ដាគណនេយ្យអន្តរជាតិ ប្រទេសកម្ពុជានឹងទាក់ទាញ អ្នកវិនិយោគកាន់តែច្រើនឡើងៗ។
លោក បាណេង បន្តថា ជំនាញគណនេយ្យមានកើនឡើងជាលំដាប់បើប្រៀបធៀបទៅនិងមុខជំនាញផ្សេងទៀតនៅក្នុងប្រទេសកម្ពុជា ។
លោក ខេស៊ី បាណេង៖«យើងឃើញវិស័យហិរញ្ញវត្ថុមានកើនពីមួយឆ្នាំទៅមួយឆ្នាំ យ៉ាងច្រើនវាមានល្បឿនលូតលាស់ខ្លាំងជាងវិស័យផ្សេង។ យើងឃើញចំនួនបុគ្គលិក យើងឃើញការផ្សព្វផ្សាយការងារផ្នែកហិរញ្ញវត្ថុច្រើនជាងគេ។ ហើយគណនេយ្យជាបេះដូងរបស់ធានាគារ ក្រុមហ៊ុន ជាបេះនៃការគ្រប់គ្រងហិរញ្ញវត្ថុ ដើម្បីគ្រប់គ្រងប្រកបដោយគុណភាព ប្រសិទ្ធិភាព សុវត្ថិភាព យើងចាំបាច់មានជំនាញកម្រិតខ្ពស់»។
ជាមួយគ្នានេះ និស្សិតកម្ពុជាចំនួន ៤ នាក់ផ្សេងទៀតដែលទទួលបានចំណាត់ថ្នាក់លេខ១ ទូទាំងពិភពលោក នៅក្នុងកម្មវិធី CPA និង CAT លើវិញ្ញាសារប្រឡងតាមកុំព្យូទ័ ចាប់តាំងពីឆ្នាំ ២០១២ រហូតដល់ឆ្នាំ ២០១៥ ក៏បានមកចូលរួមក្នុងកម្មវិធីនេះដែរ៕
