នៅទីបំផុតសភានៃប្រទេសស្រីលង្កាបាន បោះឆ្នោតមិនគាំទ្រ លោក Mahinda Rajapakse ជានាយករដ្ឋមន្ត្រីថ្មីជំនួសលោក Ranil Wickremesinghe ដែលប្រធានាធិបតី Maithripala Sirisena បានបណ្ដេញពីតំណែងកាលពីថ្ងៃទី២៦តុលា។
ប្រធានរដ្ឋសភា Karu Jayasuriya បានប្រកាសថា សមាជិកសភាសំឡេងភាគច្រើន ក្នុងចំណោម ២២៥នាក់ បានបោះឆ្នោតប្រឆាំង លោក Rajapakse ធ្វើជានាយករដ្ឋមន្ត្រី។
អ្នកសង្កេតការណ៍ចាត់ទុកសេចក្ដីសម្រេចរបស់សមាជិកសភាថា ជាការវាយសំពងអតីតប្រធានាធិបតី រូបនេះ ហើយជាការទាត់ចោលការចាត់តាំងដ៏ចម្រូងចម្រាស់របស់ប្រធានាធិបតីS irisena ។
ការបោះឆ្នោតមិនគាំទ្រលោកRajapakse ធ្វើជានាយករដ្ឋមន្ត្រី ធ្វើឡើងមួយថ្ងៃបន្ទាប់ពីតុលាការកំពូល បានទាត់ចោលសេចក្ដីសម្រេចរបស់ប្រធានាធិបតី Sirisena ដែលរំលាយរដ្ឋសភាដើម្បីបោះឆ្នោតមុនអាណត្តិនៅថ្ងៃទី៥មករាឆ្នាំ២០១៩។
តាមទីភ្នាក់ងារសារព័ត៌មាន AFP ខណៈប្រធានរដ្ឋសភា កំពុងប្រកាសលទ្ធផលបោះឆ្នោត ដែលមិនគាំទ្រឱ្យមាននាយករដ្ឋមន្ត្រីថ្មីជំនួស លោក Wickremesinghe ដែលស្រាប់តែលោក Rajapakse និងកូនប្រុសលោក ដែលជាសមាជិកសភាមួយរូបដែរបានដើរចេញពីកិច្ចប្រជុំ។
មិនត្រឹមតែលោក Rajapakse ដែលបាក់មុខក្នុងរដ្ឋសភា គឺគណៈរដ្ឋមន្ត្រីរបស់លោកទាំងមូលដែល លោកបានតែងតាំងនិងឈ្មោះសុំការអនុម័តពីសមាជិកសភាក៏ត្រូវបាន ដើរចេញពីសម័យប្រជុំដែរ។ ពួកគេបានចោទសមាជិកសភាដែលគាំទ្រនាយករដ្ឋមន្ត្រី Wickremesinghe ថា រំលោភរដ្ឋធម្មនុញ្ញ និងបទដ្ឋានរដ្ឋសភា៕