វៀតណាម៖ សភានៃប្រទេសវៀតណាមដែលបានកោះប្រជុំចុងក្រោយរបស់ខ្លួនកាលពីថ្ងៃចន្ទ កំពុងតែសម្លឹងមើលមេដឹកនាំរដ្ឋាភិបាលថ្មីរបស់ប្រទេសសង្គមនិយមមួយនេះទៅថ្ងៃអនាគត។
តាមសេចក្ដីរាយការណ៍របស់ទីភ្នាក់ងារសារព័ត៌មាន Reuter សភាប្រទេសវៀតណាមគ្រោងនឹងបោះឆ្នោតគាំទ្រនាយករដ្ឋមន្ដ្រីថ្មីប្រធានាធិបតី និងមេដឹកនាំសភានៅថ្ងៃ៧ មេសា ខែក្រោយនេះ។
កាលពីមហាសន្និបាតបក្សនៅខែធ្នូ សភាប្រទេសនេះបានអនុម័តគាំទ្រលោក ង្វៀន ភូជុង ឱ្យបន្ដកាន់តំណែងជាអគ្គលេខាធិការបក្សមួយអាណត្តិទៀត នៅខណៈដែលនាយករដ្ឋមន្ដ្រី ង្វៀន តាន យុង ត្រូវបានបោះឆ្នោតទម្លាក់។
លោក ង្វៀន តានយុង នឹងត្រូវចាកចេញពីតំណែងនៅប៉ុន្មានសប្ដាហ៍ទៀតនេះ បន្ទាប់ពីលោកបានកាន់តំណែងនាយករដ្ឋមន្ដ្រីសាធារណរដ្ឋសង្គមនិយមវៀតណាម រយៈពេលដប់ឆ្នាំចុងក្រោយនេះ។
តាមប្រភពព័ត៌មានដដែលនេះលោក Nguyen Xuan Phuc ដែលជាឧបនាយករដ្ឋមន្ដ្រី នឹងទទួលបានការអនុម័តជានាយករដ្ឋមន្ដ្រី ខណៈលោក Tran Dai Quang រដ្ឋមន្ដ្រីសន្ដិសុខជាតិ នឹងត្រូវបានតែងតាំងជាប្រធានាធិបតី ហើយលោកស្រី Nguyen Thi Kim Ngan អនុប្រធានរដ្ឋសភា នឹងឡើងជាប្រធានរដ្ឋសភា៕
ប្រភព៖ Reuters
