ភ្នំពេញ៖ សមាគមអ្នកចិញ្ចឹមសត្វកម្ពុជាថា បច្ចុប្បន្ននេះ ពុំមានជ្រូកណាមួយមកពីប្រទេសវៀតណាមចូលមកកម្ពុជាទេ។ នេះបើតាមការចុះផ្សាយលើទំព័រហ្វេសបុករបស់សមាគមន៍នេះ កាលពីថ្ងៃទី១៧ កញ្ញា។
យោងតាមការចុះផ្សាយដដែលបង្ហាញថា សមាគមអ្នកចិញ្ចឹមសត្វកម្ពុជាបញ្ជាក់ដូចនេះ តាមរយៈការឆ្លើយតបទៅនឹងការបញ្ចេញព័ត៌មានមិនពិតរបស់លោក ឌួង ឆាយ ដែលមិនឱ្យពលរដ្ឋខ្មែរទិញសាច់ជ្រូកយកមកធ្វើម្ហូបក្នុងរយៈពេលនេះ ព្រោះជូ្រកមកពីវៀតណាមងាប់ចំនួន៤០០០ក្បាលដោយសារទឹកជំនន់។
យ៉ាងណា លោក ឌួង ឆាយ បានបង្ហោះសារសុំទោសដោយសារតែការបង្ហោះនោះ ជាការភ័ន្តច្រឡំរបស់អ្នកកាន់ហ្វេសប៊ុករបស់លោក។
យ៉ាងណាមិញ សមាគមចិញ្ចឹមសត្វបញ្ជាក់ថា បច្ចុប្បន្ន មិនមានការនាំចូលជ្រូកពីវៀតណាមនោះទេ សូមប្រជាពលរដ្ឋកុំជឿនូវព័ត៌មានដែលមិនមានប្រភពច្បាស់លាស់។
សមាគមនេះបញ្ជាក់ថា រូបភាពដែលលោក ឌួង ឆាយ បង្ហោះលើហ្វេសបុកនោះគឺជារូបភាពចាស់ដែលបានចុះផ្សាយក្នុងសាព័ត៌មានវៀតណាមមួយឈ្មោះ dtinews.vn កាលពីថ្ងៃទី១៣ ខែតុលា ឆ្នាំ២០១៧ កាលណោះទឹកលិចនៅប្រទេសវៀតណាមនៅខេត្ត Thanh Hoa៕