សាលាដំបូងរាជធានីភ្នំពេញសម្រេចផ្ដន្ទាទោស ប្រធានគណបក្សតូចមួយអោយមានទោសជាប់ពន្ធនាគារ ១ឆ្នាំ៨ខែ និងសងជំងឺចិត្តប្រមាណ៥០ម៉ឺនដុល្លាទៅអោយគណៈកម្មាធិការចម្រុះកិច្ចការព្រំដែនកម្ពុជា។
ចៅក្រមជំនុំជម្រះសាលារាជធានីភ្នំពេញ លោក លិ សុខា កាលពីថ្ងៃពុធទី១០កុម្ភៈ បានប្រកាសសាលក្រមដោយសម្រេចផ្ដន្ទាទោស លោក សួង សុភ័ណ្ឌ ចំនួន១៨ខែ ពិន័យជាប្រាក់ ៤លានរៀលចូលរដ្ឋ ក្រោមបទចោទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម។
ចំពោះការពិន័យជាប្រាក់សងជំងឺចិត្ត ចំនួន ២ ០០០ លានរៀល ឬ៥០ម៉ឺនដុល្លារ គឺទៅអោយគណៈកម្មាធិការព្រំដែនកម្ពុជា របស់រដ្ឋាភិបាល ដែលជាដើមបណ្ដឹង។
លោក សួង សុភ័ណ្ឌប្រធានគណបក្សខ្មែរឈ្នះ។ជាគណបក្សតូចមួយក្នុងចំណោមគណបក្ស ជាច្រើននៅកម្ពុជា ដែលពុំមានអ្នកតំណាងរបស់ខ្លួននៅរដ្ឋសភានោះទេ។
លោក ត្រូវបានសមត្ថកិច្ចរាជធានីភ្នំពេញ ចាប់ខ្លួន កាលពីថ្ងៃទី១៤ ខែសីហា ឆ្នាំ២០២០។ កាលចាប់ខ្លួនប្រធានគណបក្សមួយនេះ បន្ទាប់ពីលោកបានចុះទៅពិនិត្យបង្គោលព្រំដែនរវាងកម្ពុជា-វៀតណាម ដែលបោះរួចនៅខេត្តត្បូងឃ្មុំ កាលពីថ្ងៃទី១០ ខែសីហា ឆ្នាំ២០២០។ ជាទីតាំងដែលលោកសួង សុភ័ណ្ឌបានចុះទៅមើលនោះ គឺជាទីតាំងដែល លោក រ៉ុង ឈុន មេដឹកនាំសហជីព និងជាតំណាងក្រុមប្រឹក្សាឃ្លាំមើលកម្ពុជា បានលើកឡើងពីរបាយការណ៍របស់ពលរដ្ឋថា មានការបាត់បង់ទឹកដីកម្ពុជាទៅលើវៀតណាម។ លោករ៉ុងឈុនបានអះអាងថា ពលរដ្ឋបានប្រាប់លោកថា ក្រោយពីបោះបង្គោលហើយ គឺដីរបស់ពួកគេ ត្រូវធ្លាក់ទៅខាងភាគី វៀតណាម។ ការថ្លែងរបស់លោករ៉ុងឈុន ជាមួយវិទ្យុអាស៊ីសេរី ហើយពេលនោះ គឺលោកត្រូវបានសមត្ថកិច្ចចាប់ខ្លួនទាំងយប់ នៅថ្ងៃនោះតែម្ដង។
លោក សួង សុភ័ណ្ឌ ដែលតាំងចិត្ត ជាអ្នកនយោបាយ និងជាអ្នកជាតិនិយម បានក៏ចូលរួមតវ៉ានៅមុខសាលាដំបូងរាជធានីភ្នំពេញ ជាមួយក្រុមយុវជនខ្មែរថាវរៈ និងពលរដ្ឋមួយចំនួនទៀត ដើម្បីទាមទារឱ្យតុលាការដោះលែង លោក រ៉ុង ឈុន។ ទាំងលោក សួង សុភ័ណ្ឌនិងក្រុមយុវជនខ្មែរថាវរៈ និងពលរដ្ឋមួយចំនួនទៀតត្រូវបានចាប់ខ្លួន។ ដោយលោករ៉ុងឈុន កំពុងស្ថិតនៅក្នុងពន្ធនាគារ ។ លោកក៏ប្រឈមនឹងការកាត់ទោស ករណីព្រំដែន ពីបទញុះញុង បង្កអោយមានអសន្តិសុខផងដែរ។
បន្ទាប់ពីស្ដាប់ចៅក្រមប្រកាសសាលក្រមរួច លោក សួង សុភ័ណ្ឌ លើកឡើងថា លោកមិនអាចទទួលយកសេចក្ដីសម្រេចរបស់តុលាការបានទេ ហើយលោកនឹងប្ដឹងជំទាស់ករណីនេះ ទៅសាលាឧទ្ធរណ៍។
បែបណា លោក សួង សុភ័ណ្ឌ បានស្នើភ្លាមៗទៅតុលាការឱ្យឃុំខ្លួនលោកនៅផ្ទះ ដូចករណីលោក កឹម សុខា ដែរ ។ លោកលើកហេតុផលមកសំអាងថា រូបលោកគឺជាប្រធានគណបក្សនយោបាយមួយ គឺ លោក កឹម សុខា ប្រធានគណបក្សនយោបាយមួយដែរ។ ការទាមទាររបស់ ប្រធានគណបក្សខ្មែរឈ្នះពុំទទួលបានការចាប់អារម្មណ៍នឹឆ្លងតបពីលោក ចៅក្រមជំនុំជម្រះសាលារាជធានីភ្នំពេញ លោក លិ សុខានោះទេ។
បែប
ណា សម្រាប់មេធាវីការពារក្ដីឱ្យរដ្ឋាភិបាល គឺលោក គួន សារឿនបានហៅ សាលក្រមប្រឆាំង
លោក សួង សុភ័ណ្ឌ គឺជាយុត្តិធម៌មួយ ចំពោះដើមបណ្ដឹង។
លោក ស៊ឹង សែនករុណា ដែលជា អ្នកនាំពាក្យសមាគមការពារសិទ្ធិមនុស្សអាដហុក គឺ ជាមន្ត្រី ការពារសិទ្ធិមនុស្ស ហើយតែងតែតាមឃ្លាំមើលរឿង របស់អ្នកនយោបាយ និង សកម្មជនសង្គម ចាត់ទុក លោក សួង សុភ័ណ្ឌ គឺជាអ្នកនយោបាយ ដែលលោកថា ការបញ្ជេញទស្សនៈ របស់លោក សួង សុភ័ណ្ឌ គឺជាសេរីភាពដែលធានាដោយច្បាប់កម្ពុជានិងច្បាប់អន្តរជាតិ។
តាមលោកស៊ឹង សែនករុណាគឺ ការចាប់ខ្លួន និងចោទប្រកាន់ទៅលើអ្នកនយោបាយ បង្ហាញថា កម្ពុជាមិនទាន់បានអនុវត្តនូវច្បាប់មួយចែងអំពីការផ្ដល់សិទ្ធិដល់អ្នកនយោបាយនោះទេ។
ចំពោះសំណុំរឿងលោក រ៉ុងឈុនវិញ បើតាមលោកសំ សុគង់ សហមេធាវីម្នាក់ បានអោយអ្នកសារព័ត៌មានដឹងថា តុលាការ បាន សម្រេចលើកសំណុំរឿងលោករ៉ុង ឈុន ទៅបន្តជំម្រះក្ដីនៅថ្ងៃទី១៧កុម្ភ ដោយតុលាការបានលើកហេតុផលថា ត្រូវការពេលវេលាបន្ថែមក្នុងសាកសួរសាក្សី។
ករណីសកម្មជនសង្គម ករណីលោករ៉ុងឈុន និង លោកសួង សុភ័ណ្ឌ សុទ្ធតែត្រូវបាន ក្រុមសង្គមស៊ីល ជាតិ និងអន្តរជាតិ ទាម
ទារអោយ ដោះលែង មានសេរីភាពឡើងវិញ។ សង្គមស៊ីវិលទាំងនោះ ចាត់ទុកជាការបញ្ចេញមតិផ្នែកនយោបាយ ដោយមានការធានាដោយរដ្ឋធម្មបុញ្ញកម្ពុជា និងច្បាប់អន្តរជាតិ ។ ក្រុមសង្គមស៊ីវិល ទាំងនោះ ចាត់ទុកករណី ទាំងនេះ គឺជារឿងនយោបាយ ។ តែបែបនេះក្ដី អ្នកនាំពាក្យក្រសួងយុត្តិធម៌ នៃប្រទេសកម្ពុជា តែងតែច្រាន ចោល ការលើកឡើងការចាប់ខ្លួន អ្នកទាំងនោះ គឺជាអំពើខុសច្បាប់ និងរំលោភសិទ្ធិមនុស្ស ដោយអះអាងថា ក្រុមមនុស្សទាំងនោះ បានបំពានច្បាប់របស់កម្ពុជា។
ខាងក្រោមនេះជាសំឡេងដែលជម្រាបជូនដោយ លោក ឡាក់ ច័ន្ទតារាៈ